School Holidays :
దేశవ్యాప్తంగా కోవిడ్-19 కేసులు రోజురోజుకూ పెరిగిపోతున్నాయి. ఆంధ్రప్రదేశ్ రాష్ట్రంలో కూడా చాపకింద నీరులా కరోనా కేసుల సంఖ్య నిశ్శబ్దంగా పెరుగుతోంది. ఈ నేపథ్యంలో, వేసవి సెలవులు ముగిసి పాఠశాలలు తిరిగి తెరవాల్సిన సమయం దగ్గరపడుతుండటంతో విద్యార్థుల తల్లిదండ్రుల్లో ఆందోళన వ్యక్తమవుతోంది. రాష్ట్రంలోని పాఠశాలలు జూన్ 12, 2025 నుంచి తిరిగి ప్రారంభం కావాల్సి ఉండగా, కరోనా కేసులు ఇదే విధంగా పెరిగితే వేసవి సెలవులను పొడిగించే అవకాశం ఉన్నట్లు తెలుస్తుంది.
పిల్లలను పాఠశాలలకు పంపడం సురక్షితమా? కాదా ? అనే ఆందోళన తల్లిదండ్రుల్లో నెలకొంది. ముఖ్యంగా చిన్న పిల్లలు, రోగనిరోధక శక్తి తక్కువగా ఉన్న విద్యార్థులపై కరోనా ప్రభావం ఎక్కువగా ఉంటుందనే భయం ఉంది. 2022లో కూడా రాష్ట్రంలో కరోనా కేసుల పెరుగుదల కారణంగా సెలవుల పొడిగింపు లేదా ఆన్‌లైన్ తరగతులను పరిగణనలోకి తీసుకున్నారు. ప్రస్తుతం కూడా ఆన్‌లైన్ లేదా హైబ్రిడ్ విద్యా విధానాన్ని అమలు చేసే అవకాశం ఉందని కొందరు విద్యాశాఖ అధికారులు సూచిస్తున్నారు.
కరోనా కేసులు పెరుగుతున్న నేపథ్యంలో ఆరోగ్య శాఖ నుంచి కొత్త మార్గదర్శకాలు జారీ అయ్యాయి. పాఠశాలల్లో కోవిడ్-సంబంధిత జాగ్రత్తలు తీసుకోవాలని, విద్యార్థులకు రెగ్యులర్ టెస్టింగ్ నిర్వహించాలని, మాస్క్‌లు, సామాజిక దూరం వంటి నిబంధనలను కచ్చితంగా పాటించాలని సూచించారు. కొన్ని రాష్ట్రాల్లో ఇప్పటికే ఈ మార్గదర్శకాలను అమలు చేస్తున్నారు. ఆంధ్రప్రదేశ్‌లో కూడా ఇలాంటి చర్యలు తీసుకునే అవకాశం ఉంది. ఆంధ్రప్రదేశ్‌లో కోవిడ్-19 కేసుల పెరుగుదలతో పాఠశాలల వేసవి సెలవుల పొడిగింపు అవకాశం కనిపిస్తోంది. విద్యార్థుల ఆరోగ్యం, భద్రతను దృష్టిలో ఉంచుకుని ప్రభుత్వం తగిన నిర్ణయాలు తీసుకునే అవకాశం ఉంది.
